Туркуем Адыгэ хасэ федерацие заулэу щылажьэхэрэм анахь инэу «Кавказ» зыфи1орэм видео Ютубым къыригъэуцуагъ, ар Шъыгъо-Ш1эжь мафэу къэсыщтым ехьыл1агъ. Стамбулк1э жъоныгъуак1эм (маим) и 21-м зэхахьэ ин щызэхащэнэу фежьагъхэу къыща1о ык1и адыгэхэр ащ къек1олъэнхэу къяджэх. Видеом къыщэгущы1эх федерацием ипащэхэр, зэлъаш1эрэ ц1ыф зэфэшъхьэфхэр ык1и ныбжьык1эхэр.
Шъыгъо-ш1эжъ мафэм Туркуем ит Адыгэ хасэ зэфэшъхьэф пстэуми зэхахьэхэр, митингхэр рагъэк1ок1ых. Мы хасэхэм къахэбгъэщын плъэк1ыщт «темыр кавказ зэгохьагъэ» федерацие, «кавказым ифонд», «кавказым ифорум» зыфи1охэрэр ык1и нэмык1хэри.
Урысыем ил1ык1о унэу Стамбул дэтым дэжь хасэ куп зэхэтыхэм гъэрек1о митинг щырагъэк1ок1ыгъагъ, ащ ц1ыф минт1у фэдиз хэлэжьэгъагъ. Интернет соцсетэу «фесебук» зыфи1орэм мыгъи Урысием ил1ык1о унэ дэжь митинг щаш1ынэу къыщатхы.
Къэ1огъэн фае, мы аужьырэ мафэхэм Абхъаз республикэм ипрезидент Туркуем к1уагъэу щы1, ар мэлылъфэгъум (апрелым) и 10-м нэс къэтынэу ары, зэ1ук1эхэр Адыгэ-Абазэ-Абхъаз диаспорэм дыри1агъэх. Багабш официальнэу Туркуе хэгъэгум къыригъэблэгъагъэу щытэп, ежь иш1оигъонк1э к1уагъэу ары.
Шъугу къэтэгъэк1ыжьы, мэлылъфэгъум и 17-м Стамбул Адыгэхэмэ митинг щырагъэк1ок1ынэу ары, ащ к1эщык1о фэхъугъэр «Адыгэмэ яфитыныгъэхэм апае зэгохьагъэ куп» зыфи1орэр ары, блэк1ыгъэ мазэм ахэмэ Анкара митинг щызэхащэгъагъ ык1и нэбгырэ минитф фэдиз хэлэжьэгъагъ. Мыхэр зыфаехэр Туркуемк1э Адыгэхэр зыщыпсэурэ къалэхэм, къуаджэхэм адэт еджэп1эхэм адыгабзэк1э ащырагъэджэнхэу ык1и адыгэ телевидениерэ радиорэ къызэ1уахынэу арых.
